4 ຄົນ · ງ່າຍ · 40 ນາທີ · ₭ ປານກາງ

ໃຜຊິບໍ່ຮູ້ຈັກຢໍ່ຂາວເນາະ ເກີດມາກະເຫັນລະ! ແຕ່ໃຜລະຊິຢາກເຮັດກິນເອງລອງເບິ່ງ ເພາະວ່າ ຢູ່ໃສກະມີຂາຍ... ແຕ່ ທີ່ແຊບໆ ມັນກະບໍ່ມີຫລາຍເຈົ້າປານໃດດອກ. ມື້ນີ້ ເລີຍຢາກແຊສູດທີ່ເຮັດໄວ້ ຢາກຫຍັງກະເອົາມາພັນໃສ່ ແຊບ ຈຸໃຈ ແລະ ສະອາດນຳອີກ :)

ເຄື່ອງປຸງ

• ແຜ່ນຢໍ່ 1 ຖົງ, ປະມານ 20-30 ແຜ່ນ
• ກຸ້ງຂະໜາດກາງ 20 ໂຕ, ແກະເປືອກອອກ ແລະ ເອົາລອກ ແລ້ວ ຜ່າເຄິ່ງໄວ້
• ໄຂ່ໄກ່ 5 ໜ່ວຍ, ເອົາໄປຈືນເປັນໄຂ່ແຜ່ນແລ້ວຊອຍເປັນເສັ້ນ
• ເສັ້ນເຂົ້າປຸ້ນ 500 ກຣາມ, ຖ້າເປັນເຂົ້າປຸ້ນ ແຫ້ງກະໄປຕົ້ມໃຫ້ສຸກກ່ອນ
• ກາລົດ 1 ຫົວ, ຊອຍເປັນຕ່ອນບາງນ້ອຍ
• ຜັກສະຫລັດນ້ອຍ 10 ໃບ, ຈີກເຄິ່ງ
• ໃບແມງແຄງ ຫລືຫອມເຮືອດ 20 ໃບ
• ຫອມລາບ 40 ໃບ
• ນ້ຳຕານ 100 ກຣາມ
• ນ້ຳປາ 2 ບ່ວງແກງ
• ນ້ຳ 4 ບ່ວງແກງ
• ເກືອ ½ ບ່ວງກາເຟ
• ນ້ຳໝາກນາວ 2 ບ່ວງແກງ
• ກະທຽມ 4 ກີບ, ສັບລະອຽດ
• ຫມາກເຜັດດິບແດງ 2 ໜ່ວຍ
• ຖົ່ວດິນຂົ້ວ 4 ບ່ວງແກງ, ບົດມຸ່ນ

ວິທີເຮັດ

ຂັ້ນຕອນ 1: ກຽມເຄື່ອງພັນທຸກຢ່າງໃຫ້ພ້ອມຢູ່ເທິງໂຕະ ຫລື ບ່ອນ ພຽງ.

ຂັ້ນຕອນ 2: ກຽມຂຽງ ຫລື ຈານໃຫຍ່ ເພື່ອຮອງເວລາຫໍ່ ແລະ ເອົານ້ຳໃສ່ຊາມໄວ້ຂ້າງ.

ຂັ້ນຕອນ 3: ວິທີຫໍ່ແມ່ນເອົາແຜ່ນຢໍ່ ແຜ່ນຫນຶ່ງ ອອກມາແຊ່ນ້ຳໃຫ້ປຽກທົ່ວ ແລະ ເອົາວາງລົງຂຽງ. ປະໃຫ້ມັນອ່ອນ ແລ້ວຈຶ່ງເອົາ ຜັກທຸກຢ່າງທີ່ກຽມໄວ້ ລົງ, ຕາມດ້ວຍ ໄຂ່ ເຂົ້າປຸ້ນ ແລະ ກຸ້ງວາງຫ່າງໆ. ແລ້ວ ພັນໄປທາງຫນ້າ ແລ້ວ ພັບ ທັງສອງຂ້າງເຂົ້າ ແລ້ວ ລິ້ງໄປທາງຫນ້າອີກບາດຫນຶ່ງ. ເຮັດແບບນີ້ຈົນກວ່າຊິແລ້ວທຸກອັນ.

ເຄັດລັບ: ກ່ອນພັນ ຄວນໃຫ້ ແຜ່ນຢໍ່ ອ່ອນ ແລະ ຫນຽວກ່ອນ ມັນຈຶ່ງບໍ່ແຕກ.

* ເຮັດແຈ່ວ:

ຂັ້ນຕອນ 1: ລະລາຍນ້ຳຕານໃນນ້ຳຮ້ອນ ຫລື ເອົາເຂົ້າໄມໂຄເວັບ.

ຂັ້ນຕອນ 2: ຕື່ມເກືອ, ນ້ຳປາ, ກະທຽມບົດ ແລະ ຫມາກເຜັດຕອນນ້ຳຍັງຮ້ອນ ມັນຈຶ່ງຫອມ.

ຂັ້ນຕອນ 3: ປະໃຫ້ມັນເຢັນ ແລ້ວ ຕື່ມນ້ຳຫມາກນາວ ແລະ ຊີມລົດຊາດຕາມໃຈມັກ ແລະ ເອົາຖົ່ວດິນລົງ ພ້ອມເສີບ ກັບ ຢໍ່ສົດໆ. ແຊບ :)