1 ຈານ · ຍາກ · 60 ນາທີ · ₭ ປານກາງ

ໃນນາມເປັນຄົນຫວຽດ, ແຈ່ວ 3 ຢ່າງນີ້ ແມ່ນຕ້ອງ ໄດ້ເຮັດ ເປັນປະຈຳ ເວລາ ເຮັດພັນຢໍ່ຂາວ ກິນຢູ່ເຮືອນ. ຂ້ອຍພ້ອມ ຈະບອກ ວິທີ ພັນຢໍ່ນຳ ເພື່ອເຈົ້າ ຈະໄດ້ ໄປ ເຮັດສູ່ ໝູ່ ຫລື ຄອບຄົວກິນ.

ສູດຈາກ IG Chubby Whale, YT Chubby Whale

ວິດິໂອ

ເຄື່ອງປຸງ

ສ່ວນປະສົມ ຂອງຢໍ່ຂາວ

• ຊີ້ນໝູສົດ 300 ກຣາມ
• ກຸ້ງຂະໜາດກາງ 10 ອັນ, ແກະເປືອກ ແລະ ເອົາຫົວອອກ
• ຫົວ ແລະ ເປືອກກຸ້ງ
• ຜັກສະຫລັດ
• ຫອມລາບ
• ຜັກບົວລະພາ
• ຜັກກຸ້ຍຊ່າຍ
• ຖົ່ວງອກ
• ໝາກແຕງ , ຊອຍເປັນເສັ້້ນບາງ
• ເສັ້ນລ້ອນ
• ນ້ຳ 1 ຖ້ວຍ

ສ່ວນປະສົມແຈ່ວ ຮ໋ອຍຊິນ ແລະ ຖົ່ວດິນ

• ກະທຽມສົດ 2 ກີບ, ສັບມຸ່ນ
• ຫອມບົ່ວແດງ 1 ໜ່ວຍ, ສັບມຸ່ນ
• ຊ໊ອສ ຮ໋ອຍຊິນ 5 ບ່ວງແກງ
• ນ້ຳປຸງ(ສະຕ໊ອກ) 175 ມິນລີລິດ
• ເນີຍຖົ່ວດິນ
• ນ້ຳຕານ ½ ບ່ວງແກງ
• ຊ໊ອດໝາກເຜັດ ½ ບ່ວງແກງ
• ນ້ຳສົ້ມສາຍຊູ ½ ບ່ວງແກງ

ສ່ວນປະສົມ ແຈ່ວ ສົ້ມຫວານ

• ກະທຽມສົດ 2 ກີບ, ສັບມຸ່ນ
• ເຜັດດິບ 1 ໜ່ວຍ, ສັບມຸ່ນ
• ນ້ຳຕານຊາຍຂາວ 5 ບ່ວງແກງ
• ນ້ຳໝາກນາວ 3 ບ່ວງແກງ
• ນ້ຳ 6 ບ່ວງແກງ, ນ້ຳອຸ່ນ
• ນ້ຳປາຫວຽດ ກາປູ 4 ບ່ວງແກງ

ສ່ວນປະສົມ ແຈ່ວເຕົ້າຈ້ຽວ

• ນົມສົດຈືດ 1 ຖ້ວຍ, ບໍ່ມີກະໄດ້
• ຕັບໝູ 40 ກຣາມ, ຊອຍບາງ
• ກະທຽມສົດ 2 ກີບ, ສັບມຸ່ນ
• ຫອມບົ່ວແດງ 1 ໜ່ວຍ, ສັບມຸ່ນ
• ເຕົ້າຈ້ຽວ 3.5 ບ່ວງແກງ
• ນ້ຳປຸງ(ສະຕ໊ອກ) 175 ມິນລີລິດ
• ນ້ຳຕານ 3 ບ່ວງແກງ
• ເນີຍຖົ່ວດິນ 2 ບ່ວງແກງ
• ຊ໊ອດໝາກເຜັດ ½ ບ່ວງແກງ
• ນ້ຳສົ້ມສາຍຊູ ½ ບ່ວງແກງ

ວິທີເຮັດ

ສິ່ງທີ່ຄວນຮູ້:

- ຜັກສະຫລັດ ຊະນິດນີ້ ເປັນທີ່ນິຍົມ ເອົາມາໃຊ້ ພັນໃນ ຫວຽດນາມ, ເພາະ ມັນໃຫ້ ລົດຊາດ ແລະ ຜິວສຳຜັດ ທີ່ພໍດີເປະ. ບາງຄົນ ອາດຈະໃສ່: ກາລົດຂູດ, ໄຂ່ຈືນ, ໃບແມງແຄງ( ຫອມເຮືອດ), ຜັກຄາວທອງ, ຫລື ຈະໃສ່ ໝາກ ຊົມພູ່ດິບ, ຫລື ໝາກມ່ວງດິບ ເພີ່ມຄວາມສົ້ມ. ແລະ ອື່ນໆ

- ເຈົ້າສາມາດໃຊ້ ໝູ 3 ຊັ້ນ, ຫລື ຊີ້ນສ່ວນ ທີ່ຕິດມັນ ກະໄດ້. ເທື່ອນີ້ ຂ້ອຍ ໄປຕະຫລາດ ສວາຍ ເລີຍໄດ້ ແຕ່ ຊີ້ນ ສັນໃນມາ ;)

- ສຳລັບ ແຜ່ນຢໍ່ ຖ້າ ເລືອກ ໂຕທີ່ ມີສ່ວນປະກອບ ແປ້ງ ສິງກະໂປ ຫລາຍກ່ອນ ມັນຈະໜຽວດີ. ສຳລັບມືໃໝ່ ແມ່ນ ຫໍ່ງ່າຍ, ແຕ່ວ່າ ເວລາກິນ ມັນຈະໜຽວ ໜ້ອຍໜຶ່ງ. ສ່ວນ ແຜ່ນ ຊະນິດທີ່ ມີ ແປ້ງເຂົ້້າຈ້າວ ຫລາຍກວ່າ ແລະ ບາງກວ່ານັ້ນ ມັນ ຂ້ອນຂ້າງ ຫໍ່ຍາກ ແຕ່ ແຊບກວ່າ!

- ຢໍ່ ທີ່ຫໍ່ແໜ້ນ ມັນຈະແຊບ ແລະ ກິນ ໄດ້ງ່າຍກວ່າ ເພາະ ເຄື່ອງທາງໃນ ມັນຈະບໍ່ ຊະອອກ ເວລາກັັດ.

- ຊີ້ນໝູຊອຍ ແລະ ວັດຖຸດິບທີ່ ມີຄວາມຊຸ່ມ ຄວນຫໍ່ ໄວ້ ທາງໃນຜັກ, ລະວັງ ບໍ່ໃຫ້ ຕິດກັບ ແຜ່ນຢໍ່ ເພາະ ມັນຈະແຕກໄດ້.

- ນ້ຳປາ, ຊ໊ອສ ຮອຍຊິນ, ແລະ ເຕົ້າຈ້ຽວ ມີຫລາຍ ຍີ່ຫໍ້ ແລະ ຄວາມເຄັມ ແຕກຕ່າງ ກັນໄປ. ສະນັ້ນ ຊີມກ່ອນປຸງ.

- ຂ້ອຍ ໃຊ້ ເຕົ້າຈ້ຽວ ຍີ່ຫໍ້ ກາເດັກສົມບູນ. ບາງ ຍີ່ ຫໍ້ ໃສ່ສະອິ້ວນຳ ບໍ່ແນະນຳໃຫ້ໃຊ້ ແບບນັ້ນ.

- ໃນ 3 ແຈ່ວນີ້ ບໍ່ສະເພາະ ແຕ່ ສຳລັບ ຈ້ຳ ຢໍ່ຂາວ, ແຕ່ໃຊ້ ທົ່ວໄປ ກັບ ຂອງກິນ ຢ່າງອື່ນກໍ່ໄດ້.

1. ສ່ວນ ຢໍ່ຂາວ

- ຕົ້ມ ເຂົ້າປຸ້ນແຫ້ງ ໃຫ້ສຸກ ຕາມ ຄຳແນະນຳ ໃນຖົງ ເຂົ້າປຸ້ນນັ້ນ (ສຳລັບ ຜູ້ຢູູ່ ຕ່າງປະເທດ)

- ຕົ້ມຊີ້ນໝູ ໃນນ້ຳ 400 ມິນລີລິດ, ພໍສຸກ ໃຫ້ຕັກອອກ ໄປຈຸ່ມ ໃນນ້ຳ ເຢັນ ປະໄວ້.

- ລວກ ກຸ້ງ ທີ່ແກະ ເປືອກ ແລ້ວ ປະມານ 1 ນາທີ.

- ສ່ວນ ເປືອກ ແລະ ຫົວກຸ້ງ ທີ່ເຫລືອ ໃຫ້ຕົ້ມໄຟອ່ອນ 10 ນາທີ ເພື່ອ ເຮັດນ້ຳປຸງ (ສະຕ໋ອກ) ໃສ່ ແຈ່ວ.

- ຊອຍໝູບາງ, ແລະ ຜ່າກຸ້ງ ອອກເປັນ 2 ປ່ຽງ.

- ວາງ ແຜ່ນ ຢໍ່ລົງ ເອົາດ້ານລຽບ ຕິດລົງຈານ.

- ເອົາ ແພຈຸບນ້ຳ ມາທາໃສ່ ທົ່ວທັງ 2 ດ້ານ ຂອງແຜ່ນຢໍ່.

- ເອົາໃບສະຫລັດ ມາ ບີບໃຫ້ ກ້ານມັນແຕກ ແລ້ວ ວາງລົງ ແຜ່ນຢໍ່, ເນັ້ນໃຫ້ມັນແປ.

- ວາງຜັກລົງໃສ່ ແຜ່ນຢໍ່ ຈຸດທາງລຸ່ມ, ຈັດໃຫ້ ອອກຊົງ 4 ຫລ່ຽມ, ຈາກນັ້ນ ໃສ່ ຫອມ, ໝາກແຕງ, ຖົ່ວງອກ, ເຂົ້າປຸ້ນ ແລະ ໝູຊອຍ ຢອງເທິງ.

- ພັບມ້ວນ ຂຶ້ນເທິງ, ພັບ ດ້ານຂວາເຂົ້າ ແລ້ວ ວາງຜັກ ກຸ້ຍຊ່າຍລົງ, ຈາກນັ້ນ ພັບ ດ້ານຊ້າຍເຂົ້າ ເພື່ອປິດໄວ້

- ວາງກຸ້ງ ລົງແຜ່ນຢໍ່, ເນັ້ນ ລົງ ແລ້ວ ມ້ວນໃຫ້ແໜ້ນ.

- ເວລາຫໍ່ ແລ້ວ ໃຫ້ ຕັ້ງ ທາງມີ ຜັກ ກຸ້ຍຊ່າຍ ຂຶ້ນເທິງ ເພື່ອຄວາມງາມ.

2. ແຈ່ວ ຮ໋ອຍຊິນ ແລະ ຖົ່ວດິນ

- ຄ້າງໝໍ້ນ້ອຍ ຈືນ ກະທຽມ ແລະ ຫອມບົ່ວ ພໍເຫລືອງຫອມ.

- ໃສ່ ຊ໊ອສ ຮ໋ອຍຊິນ( ມີຂາຍສຳເລັດຮູບ) ນ້ຳ ສະຕ໋ອກ ແລະ ເນີຍຖົ່ວດິນ (ສຳເລັດຮູບ). ຄົນໃຫ້ ເຂົ້າກັນ ຈົນ ລະລາຍ.

- ໃສ່ ນ້ຳຕານ, ຊ໋ອດ ໝາກເຜັດ ສີລາຊາ ແລະ ນ້ຳສົ້ມ ສາຍຊູ. ຊີມ ແລະ ປຸງ ຕາມໃຈມັກ!

- ປະດັບແຈ່ວ ດ້ວຍ: ຫົວກາດຂາວດອງ ແລະ ກາລົດຂູດເສັ້ນ, ຖົ່ວດິນຕຳ, ໝາກເຜັດດິບ ສັບມຸ່ນ ແລະ ຫອມບົ່ວຈຽວ.

3. ແຈ່ວ ສົ້ມຫວານ

- ຖ້າ ເຮັດຕາມນີ້ ແມ່ນ ຈະໄດ້ ກະທຽມ ແລະ ໝາກເຜັດ ລອຍຂຶ້ນ ໜ້າງາມ.

- ໃສ່ກະທຽມ, ໝາກເຜັດ ແລະ ນ້ຳຕານ ໃນຖ້ວຍ, ຄົນເຂົ້າກັນ.

- ໃສ່ ໝາກນາວ ແລະ ນ້ຳ. ຄົນຈົນໃຫ້ ນ້ຳຕານລະລາຍ.

- ສຸດທ້າຍ ຈຶ່ງໃສ່ນ້ຳປາ.

- ປະດັບໜ້າ ດ້ວຍ ຫົວກາດຂາວດອງ ແລະ ກາລົດຂູດເສັ້ນ

4. ແຈ່ວ ເຕົ້າຈ້ຽວ

- ແຊ່ ຕັບ ໃສ່ນົມ ປະມານ 30 ນາທີ ເພື່ອດັບກິ່ນ ຄາວ, ຈາກນັ້ນ ລ້າງ ອອກໃຫ້ສະອາດ..

- ໃສ່ ຕະແກງ ເນັ້ນ ໃຫ້ ນ້ຳ ອອກ.

- ຄ້າງໝໍ້ ນ້ອຍ, ຈືນ ກະທຽມ ແລະ ຫອມບົ່ວແດງ ໃຫ້ຫອມ.

- ໃສ່ຕັບ,ຂົ້ວ ແລະ ຄົນ ຈົນສຸກ ແລ້ວ ຈຶ່ງໃສ່ ເຕົ້າຈ້ຽວ ຕາມດ້ວຍ ນ້ຳສະຕ໋ອກ.

- ພໍຟົດ, ເອົາ ໄປບົດ ຈົນມຸ່ນ ໃຫ້ ເນື້ອລະອຽດດີ.

- ເອົາ ຄືນໃສ່ໝໍ້ , ໃສ່ ນ້ຳຕານກ້ອນໃຫຍ່ , ເນີຍຖົ່ວ ແລະ ຄົນ ຈົນລະລາຍ ເຂົ້າກັນ.

- ໃສ່ ຊ໊ອສ ໝາກເຜັດ ສີລາຊາ ແລະ ນ້ຳສົ້ມ ສາຍຊູ.

- ປະດັບແຈ່ວ ດ້ວຍ: ຫົວກາດຂາວດອງ ແລະ ກາລົດຂູດເສັ້ນ, ຖົ່ວດິນຕຳ, ໝາກສັບມຸ່ນ ແລະ ຫອມບົ່ວຈຽວ.

ໂຊກດີ ເດີ, ລະມາ ບອກກັນແດ່ ວ່າມັກ ແຈ່ວໃດສຸດ? ສຳລັບຂ້ອຍ ມັກ ແຈ່ວ ເຕົ້າຈ້ຽວ ສຸດ!

ເຄື່ອງມື ທີ່ໃຊ້ແຕ່ງເມນູນີ້

• ຖົງໃສ່ເຄື່ອງເທດຕົ້ມ