2 ຄົນ · ງ່າຍ · 20 ນາທີ · ₭ ຖືກ

ຜັດຂີ້ເມົາ ຫມີ່ໄວໄວ ຈີ້ດຈ໊າດ ມາແລ້ວ. ຜັດປະເພດນີ້ ມັນມີລົດຊາດເຂັ້ມຂົ້ນ ເພາະໃສ່ເຄື່ອງຫລາຍແນວ. ແລ້ວກະຜັດໆ ເຂົ້າກັບເສັ້ນໝີ່ ແບບວ່າ ເຂົ້າເນື້ອເຂົ້າໜັງສຸດໆ. ບໍ່ວ່າຫລາຍ ມາລົງມືກັນເລີຍ.

ເຄື່ອງປຸງ

• ໝີ່ໄວໄວ ລົດຕົ້ນຕຳລັບ 2 ຖົງ
• ຊີ້ນໝູສົດ 100 ກຣາມ, ຊອຍບາງ
• ໄຂ່ໄກ່ 1 ໜ່ວຍ
• ກະທຽມ 5 ກີບ
• ເຜັດດິບ 5 ໜ່ວຍ, ເພີ່ມ ຫລື ລົດໄດ້
• ກາລົດ 1 ຫົວ, ຊອຍບາງ
• ຫອມບົ່ວໃຫຍ່ 1 ໜ່ວຍ, ຊອຍບາງ
• ຜັກກາດນາ 2 ຕ່ອນ, ຕັດເປັນຕ່ອນສັ້້ນ
• ໃບຂີ້ຫູດ 2 ໃບ, ຕັດເປັນຕ່ອນສັ້້ນ
• ໃບກະເພົາ 1 ຖ້ວຍນ້ອຍ
• ຜົງປຸງລົດ 2 ຖົງ, ເຄື່ອງປຸງຫມີ່ໄວໆ
• ນ້ຳມັນຫອຍ 2 ບ່ວງແກງ
• ສະອິ້ວຂາວ ½ ບ່ວງແກງ
• ນ້ຳຕານ 1 ບ່ວງກາເຟ
• ນ້ຳມັນພືດ 2 ບ່ວງແກງ

ວິທີເຮັດ

ຂັ້ນຕອນ 1. ລວກໝີ່ໄວໄວ 1 ນາທີ ແລ້ວ ຖອກນ້ຳອອກປະໄວ້

ຂັ້ນຕອນ 2. ໃສ່ນ້ຳມັນໃນໝໍ້ກະທະ ຈຽວ ກະທຽມແລະຫມາກເຜັດໃຫ້ຫອມ ເຫລືອງ ແລ້ວ ເອົາຊີ້ນຫມູລົງ. ປຸງລົດດ້ວຍ ນ້ຳມັນຫອຍ, ເຄືອ່ງປຸງທີ່ມາກັບໝີ່, ສະອິ້ວຂາວ, ແລະ ນ້ຳຕານ. ຕອກໄຂ່ໃສ່, ຕາມດ້ວຍກາລົດ, ຫອມບົ່ວໃຫຍ່, ຜັກກາດຊອມ ແລະ ໃບຂີ້ຫູດ. ຂົ້ວໃຫ້ ຊີ້ນແລະ ຜັກສຸກ.

ຂັ້ນຕອນ 3. ເອົາເສັ້ນຫມີ່ລົງ, ໃສ່ໃບກະເພົາ, ຂົ້ວໃຫ້ເຄື່ອງເຂົ້າກັນ, ຊີມລົດໃຫ້ພໍດີ ແລ້ວເສີບ, ແຊບ!