2 ຄົນ · ປານກາງ · 60 ນາທີ · ₭ ປານກາງ

ມື້ນີ້ ທີມງານ Zap.la ມາເຮັດເຂົ້າປຸ້ນປາແດກຫວຽດນາມສູ່ກິນ. ເຮັດງ່າຍໆ ແຖມຄົບທາດອາຫານ! ມາເດີ ແຊບໆ

ວິດິໂອ

ເຄື່ອງປຸງ

• ໝູສາມຊັ້ນ 200 ກຣາມ
• ເຕົາຮູ້ທອດເປັນຕ່ອນ 100 ກຣາມ
• ເສັ້ນເຂົ້າປຸ້ນສົດ 200 ກຣາມ
• ຜັກລວມມິດ
• ເກືອ 1 ບ່ວງກາເຟ, ໃສ່ຕອນຕົ້ມໝູ
• ຖົ່ວດິນຂົ້ວ 2 ບ່ວງແກງ
• ຫອມບົ່ວໃບຊອຍ 1 ບ່ວງແກງ, ໂຮຍໃສ່ຕອນຊິກິນ
• ຈຽວຜັກບົ່ວ 1 ບ່ວງແກງ, ໂຮຍໃສ່ຕອນຊິກິນ
• ໝາກນາວ 2 ປ່ຽງ, ບີບໃສ່ຕອນຊິກິນຖ້າມັກ
• ນ້ຳມັນພືດ 1 ຖ້ວຍນ້ອຍ, ໃຊ້ຈືນເຕົາຮູ້

ເຄື່ອງປຸງແຈ່ວ

• ປາແດກຫວຽດສຳເລັດຮູບ 1 ຖ້ວຍນ້ອຍ, ປາແດກຫວຽດສຳເລັດຮູບ
• ນ້ຳຕານ 3 ບ່ວງແກງ
• ເຜັດຜົງ 1 ບ່ວງແກງ, ໃສ່ແລ້ວແຕ່ມັກ
• ກະທຽມ 2 ກີບ, ໃຊ້ກະທຽມສົດມາທຸບ, ແລ້ວຈຽວລົງນ້ຳມັນ
• ໝາກນັດ 2 ບ່ວງແກງ, ຊອຍເປັນຕ່ອນນ້ອຍ
• ນ້ຳມັນພືດ 5 ບ່ວງແກງ, ນ້ຳມັນຮ້ອນໆທີ່ໃຊ້ຈຽວກະທຽມ

ວິທີເຮັດ

1. ຖອກນ້ຳມັນໃສ່ກະທະໃຫ້ຮ້ອນ,ແລ້ວເອົາເຕົາຮູ້ລົງຈືນ ໃຫ້ເຫຼືອງກອບ. ຕັກອອກໄວ້

2. ຄ້າງໝໍ້ໃສ່ນ້ຳ ແລະ ເກືອ1ບ່ວງນ້ອຍ. ຕົ້ມໃຫ້ຟົດ, ເອົາຊີ້ນໝູລົງຕົ້ມໃຫ້ສຸກ ປະມານ 30ນາທີ ແລ້ວຕັກອອກ ປະໃຫ້ເຢັນ ແລະ ຊອຍໄວ້

3. ເຮັດນ້ຳແຈ່ວ:

- ຖອກປາແດກຫວຽດ ໃສ່ຖ້ວຍ, ໃສ່ນ້ຳຕານ 3ບ່ວງແກງ, ໃສ່ເຜັດຕຳ, ກະທຽມຈຽວ, ໝາກນັດຊອຍ, ຄົນໃຫ້ເຂົ້າກັນ. ແລ້ວຖອກນ້ຳມັນທີ່ໃຊ້ຈືນເຕົາຮູ້ ແລະ ຈຽວກະທຽມຮ້ອນໆລົງຖ້ວຍແຈ່ວ (ປະມານ 5 ບ່ວງແກງ) ຄົນໃຫ້ເຂົ້າກັນດີ.

4. ກຽມຜັກ ແລະ ເຂົ້າປຸ້ນໃສ່ຖ້ວຍ, ພ້ອມດ້ວຍຊີ້ນໝູຕົ້ມຊອຍ. ລາດນ້ຳແຈ່ວທີ່ເຮັດລົງໄປ. ໂຮຍຖົ່ວດິນ, ຫອມບົ່ວຈຽວ, ແລະ ຜັກບົ່ວໃບລົງ. ພ້ອມແຊບໄດ້ !