4 ຄົນ · ປານກາງ · 60 ນາທີ · ₭ ຖືກ

ໝ້ຽງເຂົ້າ ຫລື ບາງຄົນເອີ້ນ ໝ້ຽງເມືອງຫລວງ, ກິນຍາມໃດ ແຊບຍາມນັ້ນ. ບາງເທື່ອ ແມ່ ມັກຊື້້ມາໃຫ້ກິນ ຍາມໄປຕະຫລາດຍາມແລງ. ມື້ີນີ້ ລອງມາເຮັດ ກິນເອງ ເບິ່ງເນາະ

ເຄື່ອງປຸງ

• ເຂົ້າໜຽວແຫ້ງ 500 ກຣາມ
• ນ້ຳມັນພືດ ½ ລິດ
• ກະທຽມ 7 ກີບ
• ນ້ຳຕານ 100 ກຣາມ
• ແປ້ງນົວ 1 ບ່ວງກາເຟ, ໃສ່ກະໄດ້ ບໍ່ໃສ່ກະໄດ້
• ປາແດກ 2 ບ່ວງແກງ
• ນ້ຳປາ 1 ບ່ວງແກງ
• ນ້ຳ 1 ລິດ
• ຜັກສະຫລັດ 300 ກຣາມ
• ຖົ່ວດິນຂົ້ວ 300 ກຣາມ
• ຫົວສີໄຄ 12 ກ້ານ, ຊອຍບາງໆ
• ໝາກເຟືອງ 3 ໜ່ວຍ, ຊອຍຕ່ອນນ້ອຍໆ (ຖ້າບໍ່ມີໃຊ້ຫມາກມ່ວງດິບສົ້ມກໍ່ໄດ້)
• ໝາກເຜັດແຫ້ງທອດ 200 ກຣາມ

ວິທີເຮັດ

1. ເອົານ້ຳມັນ ໃສ່ຫມໍ້ (ແບ່ງເອົາ ນ້ຳມັນ ໄວ້ຫນ້ອຍຫນຶ່ງ ເອົາໄວ້ເຮັດ ຂົ້ວຫມ້ຽງເຂົ້າ) ປ່ອຍໃຫ້ ນ້ຳມັນຮ້ອນ ແລ້ວ ເອົາ ເຂົ້າຫນຽວແຫ້ງ ລົງຈືນ ໃຫ້ຫອມເຫລືອງ (ພະຍາຍາມ ຈືນ ໃຫ້ເຫລືອງ ເພາະເວລາ ເອົາໄປເຮັດ ມັນຈິ່ງຊິ ເຫລືອງງາມ). ຕັກເຂົ້າ ທີ່ຈືນແລ້ວປະໄວ້ ໃຫ້ສະເດັດ ນ້ຳມັນ ແລ້ວນຳໄປຕຳ ຫລື ບົດ ໃຫ້ລະອຽດ.

2. ເອົາ ຫມາກເຜັດແຫ້ງ ລົງຈືນຕໍ່ ໃສ່ນ້ຳມັນ ທີ່ຈືນເຂົ້າ ແລ້ວນັ້ນ, ຕັກອອກ ປະໄວ້ ກິນກັບ ຫມ້ຽງເຂົ້າ.

3. ເອົານ້ຳມັນພືດ ທີ່ແບ່ງໄວ້ລົງຫມໍ້ ໃຊ້ໄຟປານກາງ ແລ້ວ ເອົາກະທຽມ ລົງຈຽວໃຫ້ເຫລືອງ. ຈາກນັ້ນໃສ່ ນ້ຳຕານ ຈຽວຈົນນ້ຳຕານແດງ ແລ້ວ ເອົານ້ຳປາແດກ+ນ້ຳປາ+ ແປ້ງນົວ+ນ້ຳດື່ມ ໃສ່ຫມໍ້ ຕົ້ມ ອີກປະມານ15ນາທີ. ແລ້ວ ເອົາເຂົ້າທີ່ ຕຳແລ້ວ ປັບໃສ່ ໄຟອ່ອນ ຄົນອີກປະມານ 5 ນາທີ ຈົນມັນຟູຂຶ້ນ ຊິມລົດຊາດ ສາມາດ ປຸງເພິ້ມໄດ້ຕາມໃຈມັກ.

4. ນຳເອົາ ຜັກສະລັດ ຫລື ຜັກອີ່ເລີດມາພັນ ໂດຍຕັກເຂົ້າ ທີ່ເຮົາປຸງລົດຊາດ ແລ້ວນັ້ນ ໃສກ່ອນ+ຫົວສີໄຄ+ຫມາກເຟືອງ+ ຫມາກຖົ່ວດິນ ແລ້ວຫໍ່ ໃຫ້ເປັນຄຳ, ຖືວ່າສຳເລັດ ເວລາຈະກິນແມ່ນ ກິນກັບຫມາກເຜັດທອດ. ແຊບ!