4 ຄົນ · ປານກາງ · 50 ນາທີ · ₭ ປານກາງ

ກ້ຽວໝູສັບ ເປັນເມນູດີໆ ໂດຍສະເພາະສຳລັບ ຄອບຄົວ. ເປັນເມນູສ້າງກິດຈະກຳ ທີ່ເຮັດໄດ້ ກັບລູກໆ ເອີ້ນມາຫໍ່ກ້ຽວຊ່ອຍກັນ ແລະ ເໝາະທີ່ສຸດແມ່ນ ເຮັດກິນຍາມແລງ ຕອນອາກາດໜາວ ຫລືຝົນຕົກ.

ເຄື່ອງປຸງ

• ຊີ້ນໝູບົດສົດ 250 ກຣາມ
• ແຜ່ນຫໍ່ກ້ຽວ 1 ແພັກ
• ກະທຽມສົດ 2 ກີບ, ສັບລະອຽດ
• ຫອມປ້ອມ ½ ບ່ວງແກງ, ສັບລະອຽດ
• ນ້ຳຕານ 1.5 ບ່ວງກາເຟ
• ພິກໄທຂາວປົ່ນ ¼ ບ່ວງກາເຟ
• ສະອິ້ວ 1.5 ບ່ວງແກງ
• ນ້ຳມັນງາ 1 ບ່ວງກາເຟ
• ນ້ຳມັນຫອຍ 1 ບ່ວງກາເຟ
• ແປ້ງສາລີ ½ ບ່ວງແກງ
• ນ້ຳ 1 ລິດ
• ຮາກຜັກຫອມປ້ອມ 2 ຮາກ, ໃສ່ນ້ຳຊຸບ
• ຂີງສົດ 2 ປ່ຽງ, ໃສ່ນ້ຳຊຸບ
• ສະອິ້ວຂາວ 1 ບ່ວງກາເຟ, ໃສ່ນ້ຳຊຸບ
• ຊຸບກ້ອນໝູ 1 ກ້ອນ, ໃສ່ນ້ຳຊຸບ
• ຫອມບົ່ວໃບຊອຍ 2 ບ່ວງແກງ, ໄວ້ໂຮຍໜ້າຕອນເສີບ
• ກະທຽມຈຽວ 4 ບ່ວງກາເຟ, ໄວ້ໂຮຍໜ້າຕອນເສີບ
• ພິກໄທດຳປົ່ນ ¼ ບ່ວງກາເຟ, ໄວ້ໂຮຍໜ້າຕອນເສີບ

ວິທີເຮັດ

1. ກຽມເຮັດ ໄສ້ໝູສັບ:

ເອົາຊາມມາ ປະສົມຊີ້ນໝູ +ກະທຽມ+ນ້ຳຕານ+ຫອມປ້ອມ+ພິກໄທຂາວປົ່ນ+ແປ້ງສາລີ+ ສະອິ້ວ+ນ້ຳມັນຫອຍ+ນ້ຳມັນງາ. ຄົນໃຫ້ເຂົ້າກັນ ແລະໝັກໄວ້ ປະມານ 15 ນາທີ. ຊີມລົດຊາດໃຫ້ພໍດີ

2. ຫໍ່ກ້ຽວ:

- ໃຊ້ບ່ວງຕັກໄສ້ໝູສັບ ແລະ ວາງລົງເຄິ່ງກາງແຜ່ນກ້ຽວ.

- ໃຊ້ນິ້້ວມື ຈຸບນ້ຳ ແລ້ວ ເອົາມາທາຂອບຂອງແຜ່ນກ້ຽວ, ພັບອີກດ້ານ ເຂົ້າຕິດກັນ ແລ້ວໃຊ້ມື ບີບໆ ເພື່ອໃຫ້ມັນປິດແໜ້ນ. ຫລືຖ້າໃຜເກັ່ງກະ ເຮັດໄດ້ຫລາຍແບບ (ຊອກເບິ່ງວິທີຫໍ່ທາງຢູທູບ). ຖ້າສັງເກດວ່າ ປິດບໍ່ໄດ້ ແມ່ນໃຫ້ເອົາໄສ້ອອກອີກ ເພາະມັນຈະແຕກເວລາຕົ້ມ.

- ຫໍ່ແລ້ວໃຫ້ວາງລຽງກັນໃສ່ເຈ້ຍ ໄຂມັນ (ເຮັດເຂົ້າໜົມ) ເພື່ອບໍ່ໃຫ້ມັນຕິດກັນ.

3. ວິທີຕົ້ມກ້ຽວ:

ຄ້າງໝໍ້ຕົ້ມນ້ຳໃຫ້ຟົດ, ຄ່ອຍໆ ຢ່ອນກ້ຽວລົງ ແລ້ວຕົ້ມ ປະມານ 3 ຫາ 5 ນາທີ. ສັງເກດ ເວລາສຸກ ມັນຈະລອຍຂຶ້້ນມາ ແລະ ສີແຜ່ນກ້ຽວຈະອອກໃສໆ. ໃຊ້ຈອງທີ່ເປັນຕາຫນ່າງຕັກກ້ຽວອອກ. ( ເສີບຮ້ອນໆ ກິນກັບແຈ່ວ ສະອິ້ວສົ້ມເລີຍກະໄດ້ ຫລື ໄວ້ໃສ່ເປັນກ້ຽວນ້ຳ)

4. ວີທີເຮັດນ້ຳຊຸບ: ( ຂ້ອຍໃຊ້ ຊຸບກ້ອນໝູ ແທນການຕົ້ມໝູ ເພາະປະຢັດເວລາແດ່)

- ຄ້າງໝໍ້ ໃສ່ນ້ຳ +ຂີງ+ ຮາກຫອມປ້ອມ+ ສະອິ້ວຂາວ+ ກ້ອນຊຸບລົດໝູ. ຕົ້ມໃຫ້ຟົດ 5 ນາທີ. ຊີມລົດຊາດໃຫ້ພໍດີ.

5. ເອົາກ້ຽວໃສ່ ໃນຖ້ວຍ, ໂຮຍໜ້າດ້ວຍ ຜັກບົ່ວໃບຊອຍ + ກະທຽມຈຽວ+ ພິກໄທປົ່ນ + ຕັກນ້ຳຊຸບໃສ່ ແລະ ກຽມແຊບໄດ້ເລີຍ.